Connect with us
Advertisement
Advertisement

Cymraeg

Pentref gyda gwahaniaeth

Published

on

Y Michaels: Parti groesawu teulu'r Michaels

YM MHENTRE’ Cymreig Llanifeiliaid rydych chi’n siŵr o ddod o hyd i ambell i gymeriad!

Ar un ochr y pentref mae Enid ac Elsi, dwy sydd wedi adnabod ei gilydd ers oes yr arth a’r blaidd; ar ochr arall y pentref mae Huw, y guru fasiwn; a dros y ffordd mae’r wheeler dealer, Vinnie Farchnad.

Byddwch chi’n gyfarwydd â chymeriadau’r rhaglen hon… ond; byddwch chi’n deall yn sydyn iawn bod rhywbeth gwahanol am drigolion pentref traddodiadol Cymreig Llanifeiliaid: maen nhw’n cerdded ar bedair coes ac mae gan rai adenydd. Ie, anifeiliaid ydyn nhw.

Gan ddefnyddio ffilm o anifeiliaid a saethwyd ym Mharc Antur a Sw Fferm Ffoli, Sw Bryste, a Pharc Bywyd Gwyllt Cotswold, mae’r rhaglen yn defnyddio lleisiau nifer o actorion adnabyddus ar gyfer cymeriadu’r anifeiliaid, gan gynnwys Siw Hughes, Sue Roderick, Catrin Mara a John Pierce Jones, a’r cyflwynydd radio Aled Hughes yn adrodd y cyfan i ni.

Mae cyflwynydd Stwnsh Owain Williams, o Sanclêr ger Caerfyrddin, hefyd yn un o’r actorion sy’n rhoi llais i’r anifeiliaid, ac roedd hefyd yn ysgrifennu’r sgript ar y cyd gyda Non Parry. Wrth esbonio’r broses, mae’n cyfaddef “Fi’n gwneud y fath yma o beth ta beth yn fy mhen! Mae’n ffordd wahanol o ‘people-watchio’ – gwylio pobl wrth iddyn nhw fynd ambytu eu busnes a chreu stori am eu cefndir, lle maen nhw’n mynd a beth maen nhw’n meddwl.

“Gwyliais i’r ffilm wnaeth y cwmni cynhyrchu saethu o emu, er enghraifft, a holi’r cynhyrchydd, “Ai fi yw e, neu ydy’r emu yma’n sexy?” O fewn chwinciad ro’n i’n siarad mewn llais rhywiol ac yn siarad am ddod o hyd i ŵr rhif pump. A dyma sut daeth cymeriad Beatrice Bigdrwyn yn fyw,” meddai Owain.

“Mae’r gyfres newydd hon yn dod o hyd i’r absẃrd mewn digwyddiadau normal bob dydd,” meddai Owain. “Mae’n rhaglen unigryw bydd rhieni’n gallu gwylio gyda’u plant a fydd y plant ddim yn sylwi ar rai o’r elfennau sy’ bach yn agos i’r bôn.”

Bydd y bennod gyntaf yn ein cyflwyno i drigolion Llanifeilaid wrth i deulu o meerkats, y Michaels symud i’r ardal. Bydd pob pennod â stori benodol – o gynnal parti i groesawu teulu’r Michaels ac o ymweliad yr anifeiliaid i’r Eisteddfod Genedlaethol i godi arian at do newydd Clwb Rygbi Llanifeiliaid.

Mi fydd y gyfres newydd hon yn hwyl i’r teulu cyfan – gan gynnwys nain, taid, y gath a’r ci!

Cymraeg

Mae y byd yn dod i Langollen

Published

on

“Y byd yn uno mewn dathliad lliwgar a llawen”: Yn Eisteddfod Ryngwladol Llangollen

BOB BLWYDDYN mae’r byd yn dod i Langollen, tref fechan yng ngogledd-ddwyrain Cymru, gan drawsnewid y dref gysglyd gyda môr o liw, can a dawns ar gyfer Eisteddfod Ryngwladol Gerddorol Llangollen. Os na fedrwch fod yno, bydd S4C yn dod â bwrlwm yr ŵyl i’ch ystafell fyw gyda darlledu byw o’r pafiliwn a rhaglenni uchafbwyntiau gyda’r nos.

Mae’r cyflwynwyr Nia Roberts a Trystan Ellis-Morris yno i’n tywys trwy’r hwyl mewn rhaglenni uchafbwyntiau nosweithiol gyda chymorth arbenigwyr i drafod a dadansoddi’r cystadlaethau corawl, dawns, unigol ac offerynnol. Un o arbenigwyr eleni fydd y soprano Elin Manahan Thomas, un o berfformwyr Gala yr Eisteddfod y llynedd a wnaeth hefyd berfformio yn ystod priodas Dug a Duges Sussex, Tywysog Harry a Meghan Markle fis Mai eleni.

Fel rhan o’r uchafbwyntiau nosweithiol bydd eitemau arbennig wedi eu ffilmio o flaen llaw yn dilyn cystadleuwyr o Gymru, Iwerddon ac Indonesia i ddangos pwysigrwydd yr Eisteddfod Ryngwladol i bobl o ddiwylliannau amrywiol o amgylch y byd.

Y cyflwynydd Morgan Jones fydd yn cyflwyno gyda Elin Llwyd yn fyw o’r maes ar brynhawn dydd Sadwrn gan roi blas o’r cyffro o amgylch y maes ac yn y dref. “Dwi wedi cael cyfle i fynd allan i gwrdd â grwp ddawns Al Zhir yn Jakarta, Indonesia, un o ddinasoedd fwya’r byd. Cawn ddod i nabod y cystadleuwyr yn yr eitemau a byddwn ni’n dilyn eu hanes wrth iddyn nhw gystadlu yn yr Eisteddfod Ryngwladol,” meddai cyn ychwanegu, “Dwi’n edrych mlaen i groesawu criw Jakarta i Gymru!”

“Bob blwyddyn dwi’n edrych ymlaen at y teimlad o frawdgarwch rhwng cenhedloedd. Dyma yw pam fod gymaint o’r cystadleuwyr yn dod nôl bob blwyddyn oherwydd ei fod yn ŵyl o fri sy’n cael ei pharchu yn rhyngwladol, ac mae pawb yn awyddus i fod yn rhan o’i hanes cyfoethog ac i fod yn rhan o’r hwyl sydd i’w gael ar y maes ac yn y dref,” meddai Morgan.

Bydd yr wythnos yn gorffen gyda crescendo ar nos Sadwrn wrth i enillwyr y corau ieuenctid, cymysg, merched, dynion a’r categorïau agored cystadlu am deitl mawreddog Côr y Byd 2018, tlws Luciano Pavarotti a gwobr ariannol gwerth £3,000.

Ymunwch â ni yn n fechan Llangollen am wledd o gerddoriaeth a dawns wrth i’r Eisteddfod Ryngwladol dod a’r byd yn un am wythnos arbennig.

Continue Reading

Cymraeg

Eglwys Madagascar yn ymweld â Cheredigion

Published

on

Dwy gan mlynedd o bartneriaeth: Pwysigion o Fadagascar gydag aelodau Cyngor Sir Ceredigion

AR DDYDD Iau, 7 Mehefin, cwrddodd nifer o bwysigion o Fadagascar gydag aelodau Cyngor Sir Ceredigion fel rhan o ddathliadau y cafodd eu cynnal yng Ngheredigion i ddathlu deucanmlwyddiant o’r cenhadon cyntaf a deithiodd o ardal Aberaeron i Fadagascar.

Ymwelodd y pwysigion o Fadagascar, gan gynnwys Mr Marc Ravalomanana, cyn-Lywydd Madagascar a Chadeirydd Pwyllgor Dathliadau Deucanmlwyddiant Eglwys Iesu Grist ym Madagascar (FJKM), Ceredigion dros gyfnod o ddiwrnodau. Fe wnaethant fynychu cyngherddau dathlu a gweld arddangosfeydd a oedd yn arddangos coffau o ymdrechion ac etifeddiaeth y cenhadwyr o gapel Neuaddlwyd a sefydlodd eglwys ar ynys Madagascar 200 mlynedd yn ôl – eglwys sy’n llwyddiannus ac yn cael ei fynychu’n dda hyd heddiw.

Dywedodd Cadeirydd y Cyngor, y Cynghorydd Hag Harris, a gyflwynodd Mr Ravalomanana gyda plac o crest y Cyngor, “Roedd yn anrhydedd i groesawu’r ymwelwyr o Fadagascar i Geredigion a chlywed sut wnaeth y cenhadwr hwylio a sefydlu eglwys yno, sy’n dal i fod yn gryf heddiw. Mae cyfleoedd fel hyn yn ein galluogi ni i adlewyrchu a dathlu ar y cysylltiadau sydd gan ein sir ni gyda lleoedd ledled y byd a’r cyfraniadau cadarnhaol y gallwn eu darparu i eraill.”

Continue Reading

Cymraeg

Cyhoeddi ‘geiriadur’ o Enwau Lleoedd Cymru

Published

on

'Un gam o’r ffordd': Dai Lloyd, AC

BYDD RHESTR gynhwysfawr o enwau lleoedd Cymru yn cael ei chyhoeddi gan Gomisiynydd y Gymraeg ar 20 Mehefin, fydd yn cynnig sillafiad safonol ar gyfer enwau pentrefi, trefi a dinasoedd yng Nghymru.

Mae’r rhestr, fydd ar gael ar-lein ar wefan Comisiynydd y Gymraeg, yn cael ei disgrifio fel ‘geiriadur’ i wirio sut i sillafu enwau lleoedd. Mae bron i 3,000 o enwau ar y rhestr, ac mae’n ffrwyth blynyddoedd o waith ymchwil ac ymgynghori yn y maes.

Yn ystod wythnos Eisteddfod yr Urdd eleni bu’r Comisiynydd yn gofyn i ymwelwyr brofi’r rhestr ddigidol ar ei stondin. Erbyn diwedd yr wythnos roedd dros 750 o binnau wedi eu rhoi ar y map yn nodi fod enw tref neu bentref wedi ei wirio ac mae unrhyw enwau oedd yn ymddangos ‘ar goll’ wrthi’n cael eu hychwanegu at y rhestr.

Dywedodd Comisiynydd y Gymraeg, Meri Huws, “Rydym yn hynod o falch ein bod bellach mewn sefyllfa i gyhoeddi rhestr safonol o enwau lleoedd yng Nghymru. Mae’r digwyddiad hwn yn benllanw blynyddoedd o waith ymchwil gan ein tîm bychan o fewn Comisiynydd y Gymraeg mewn ymgynghoriad â phanel o arbenigwyr ar enwau lleoedd. Rydym yn ddiolchgar iawn i’r arbenigwyr hyn am eu cyfraniad anhepgor at y prosiect hwn yn sicrhau bod sail gadarn i bob un o’r argymhellion.

“Mae gan lawer ohonom farn bersonol am sut i ysgrifennu enwau lleoedd yn ein milltir sgwâr ac mae’n bosibl na fydd pawb yn cytuno â phob argymhelliad ar y rhestr. Nid gorfodi yw ein bwriad, ond yn hytrach argymell, a cheisio sicrhau bod cysondeb yn y modd yr ydym yn sillafu enwau lleoedd yng Nghymru mewn cyd-destunau swyddogol.”

Un o’r sefydliadau sydd eisoes wedi cyhoeddi y byddant yn gwneud defnydd o’r rhestr newydd yw’r Arolwg Ordnans.

Yn ôl Pam Whitham, Rheolwr Perthnasau’r Arolwg Ordnans, “Mae gennym bartneriaeth werthfawr â swyddfa Comisiynydd y Gymraeg, ac maen nhw wedi chwarae rôl allweddol wrth i ni ddatblygu ein Polisi Enwi Cymraeg a sicrhau cysondeb o ran enwau lleoedd yng Nghymru yn ein holl gynnyrch. Rydym yn falch iawn o fod yn parhau i weithio â’r Comisiynydd ac yn croesawu’r rhestr hon fel adnodd gwerthfawr i ddiffinio enwau lleoedd yng Nghymru.”

Bydd y rhestr yn cael ei lansio mewn digwyddiad ym Mae Caerdydd, dan nawdd Dr Dai Lloyd AC. Gwnaeth Dr Dai Lloyd ymgais ym Mawrth 2017 i gyflwyno mesur fyddai’n diogelu enwau lleoedd yng Nghymru, ond pleidleisiodd y Cynulliad yn erbyn y cynnig ar y pryd.

Dywedodd Dr Lloyd, “Mae rhoi’r enwau ar gof a chadw ar restr fel hon yn mynd gam o’r ffordd at sicrhau bod y ffurfiau safonol yn cael eu cofnodi a’u parchu. Er mwyn gwirioneddol ddiogelu’r enwau lleoedd, a sicrhau na ddaw enwau eraill i gymryd eu lle’n fympwyol, credaf bod angen statws cyfreithiol i’r rhestr hon, fel sydd wedi digwydd mewn nifer o wledydd eraill.”

Wrth safoni enwau lleoedd, mae’r panel o arbenigwyr wedi bod yn dilyn canllawiau pendant. Maent yn talu sylw i ynganiad a tharddiad yn ogystal â defnydd lleol a defnydd hanesyddol o’r enw.

Mae Dr Dylan Foster Evans o Brifysgol Caerdydd yn aelod o’r panel. Dywedodd, “Mae enwau lleoedd yn rhan o’n treftadaeth a’n hunaniaeth – dyna pam y mae cymaint ohonom â diddordeb byw ynddynt. Dim ond yn yr ugeinfed ganrif y cafodd system sillafu’r Gymraeg ei safoni’n drylwyr. Bu enwau lleoedd yn araf deg yn dilyn y drefn honno: mae sillafiad megis Caernarvon yn edrych yn Seisnig a dieithr inni heddiw, ond dyna’r ffurf sydd ar gadair Eisteddfod Genedlaethol 1935!

“Nid mater du a gwyn yw sillafu enwau lleoedd, ac nid pawb a fydd yn cytuno â phob argymhelliad. Ond mae cytuno ar ffurfiau safonol mewn cronfa fel hon yn rhywbeth hanfodol os yw’r Gymraeg i fod yn iaith fodern ac addas ar gyfer yr oes ddigidol sydd ohoni.”

Bydd y rhestr ar gael i’w chwilio a’i lawrlwytho o dan drwydded agored ar wefan Comisiynydd y Gymraeg: https://bit.ly/2tjAvOG.

Continue Reading
News1 day ago

Pembroke: Emergency services dealing with another suspicious substance

EMERGENCY SERVICES have returned to Pembroke Castle this afternoon (July 20) following reports of another container with a suspicious substance...

News1 day ago

Pembroke Dock: Indian restaurant owner sexually assaulted teenager

THE OWNER of a Pembroke Dock restaurant who sexually assaulted the same girl three times has been made the subject...

News1 day ago

Trade union says health board’s proposed changes are inadequate

UNISON has released its formal submission to Hywel Dda’s consultation and said the lack of detail of how and when...

News2 days ago

Pharmacy burglars smashed through ceiling

THE POLICE have issued a warning following a burglary at a chemist in Milford Haven in which a large quantity...

News2 days ago

Council and teaching union come to agreement over possible redundancies

PEMBROKESHIRE COUNTY COUNCIL and The National Association of Schoolmasters Union of Women Teachers (NASUWT) have come to an agreement about the...

News2 days ago

St Davids: Police to deal ‘appropriately’ with prank call

POLICE responded to a prank phone call in St Davids yesterday (Jul 18) after receiving a report which raised concerns...

News3 days ago

Pembroke Castle: Police investigating novichok hoax which wasted thousands

DYFED-POWYS POLICE has told The Pembrokeshire Herald that the operation at Pembroke Castle on Friday and Saturday (Jul 14-15) is...

News3 days ago

‘Concerning incident’ school letter worries parents

PARENTS have been worried about the vague details released about a ‘concerning incident’ which took place at Ysgol Glan Cleddau in...

News4 days ago

Inquest concludes a tank barrel flaw was responsible for deaths

A CORONER has reached the conclusion that a fatal explosion in a British Army tank was the result of a...

News4 days ago

Rapist councillor will still receive pay despite conviction

THE PEMBROKESHIRE COUNTY COUNCILLOR convicted of child sex abuse will receive his monthly pay despite his 18-year jail sentence. David...

Popular This Week